تطبيق سناب-شات يحتفل بليلة القدر مع المسلمين بتغطية حية مصوّرة | #mecca_live

297
shares
شارك على فيسبوك
شارك على تويتر
شارك على لينكدإن
+
What's This?

أبليكاشن SnapChat للرسايل المصورة من الأبليكاشنز اللي شدت انتباه شريحة كبيرة من المستخدمين خاصة المراهقين (أكتر من 60 مليون مستخدم – وأكتر من 30 مليون مستخدم متفاعل شهرياً)، نظراً لميزة الخصوصية اللي فيه وهي إنك بتبعت snap للمتحدث وبتختفي بعد ما بيشوفها مباشرةً وممكن تحذفها قبل ما يشوفها ولا كأنها اتبعتت، فمفيش محتوى بيتم حفظه كأرشيف في سيرفرات الأبليكاشن، وديه نسبياً ميزة أمان مش موجودة في أبليكاشنز المحادثات التانية، خلت مثلاً إن في أكتر من 400 مليون سناب بيتم إرسالها في اليوم الواحد، وإن حوالي 70% من المستخدمين من البنات، وحوالي 5% من الصور السيلفي اللي بتتشيّر على السوشيال ميديا مصدرها snapchat.

مؤخراً snapchat بيحاول إنه يدخل صناعة الأخبار والنشر News & Publishing ، وبيحاول يعمل أنشطة لايف من خلال إنه بيتيح للمستخدمين خدمة تغطية لايف لأحداث معينة/ مدن معينة بتهم فئات كبيرة في الفن والرياضة والسياحة والأكل، منها ما حدث مؤخراً إنهم غطوا #تل_أبيب_لايف #TelAvivLive مما أثار استياء المستخدمين العرب (وصل مجموع التويتات على الهاشتاجين أكتر من 75 ألف تويتة ما بين مؤيدة ومعارضة)، فطلعت دعوات للأبليكشن من مستخدمين عرب ومسلمين إنهم يعملوا القدس لايف، أو مكة لايف في ليلة القدر.

كانت أول تويتة اتكتبت على هاشتاج #mecca_live لإحدى المستخدمات اللي بتتمنى إن Snapchat يغطي ليلة القدر السنة ديه:

Screenshot_8

فاستجاب SnapChat وعمل امبارح تغطية لايف لمكة المكرمة في ليلة القدر، وبدأ تفاعل المسلمين والعرب على الهاشتاج، وكمان الأجانب، وكان الهاشتاج الرسمي #mecca_live تريندنج trending على تويتر، فوصلت عدد التويتات إلى:
– على هاشتاج: #mecca_live وصلت إلى: 1,035,107 تويتة.
– وعلى هاشتاج: #meccalive وصلت إلى: 108,051 تويتة.
– وعلى هاشتاج: #مكة_لايف وصلت إلى: 89,505 تويتة.

صورة للتغطية على الأبليكاشن:

وقامت شركة الإتصالات السعودية STC بعمل promotion للهاشتاج في أكتر من دولة عربية وكمان نزّلت فيديو على تويتر مدته 30 ثانية (وده مش متاح لكل الناس) بتجاوب فيه على سؤال ليه المسلمين بيروحوا مكة على الهاشتاج (الفيديو على يوتيوب بس جايب مشاهدات قليلة – معيش إحصائيات عن مشاهداته على تويتر):

ومع تفاعل المسلمين والعرب، كان المشهد اللي جذب الإنتباه أكتر هو تفاعل الأجانب مع الحدث، وديه كانت أبرز التويتات:

Screenshot_6 Screenshot_5 Screenshot_4

Screenshot_11 Screenshot_10

في النهاية؛ ديه طبعاً حركة ذكية جداً من الأبليكاشن عشان يجذب مستخدمين جدد مش أكتر، شوفناه راح إسرائيل، وامبارح راح مكة، ولو في مستخدمين في المريخ أكيد هايروحلهم. واحتمال كبير بعد ما تقرأ المقال ده تروح تنزل الأبليكاشن على جهازك.

Screenshot_12

والجدير بالذكر إن Snapchat اللي تم إطلاقه في سبتمبر 2011 (أربع سنين بس) اتعرض عليه 3 مليار دولار من فيسبوك ومؤسسه رفض، و4 مليار دولار من جوجل ومؤسسه رفض برضه لرؤيته إن الأبليكاشن قيمته في المستقبل هاتبقى أكبر من كدة بكتير. وده اللي من الواضح إن التطبيق بيحققه مع الوقت، ومع الأفكار اللي زي ديه واللي بيتفرد بيها في انتصار للسوشيال ميديا وقوتها، وفي انتصار للمراهقين اللي بيبصوا لفيسبوك غير بصة راجل تمانية وعشريناتي زيي، بيبصوله كراجل كهل كبير في السن، وده أعتقد أكبر كابوس بيؤرق مارك زوكربيرج وكان سبب لشراؤه كل من واتس-آب وإنستجرام، فهل هاينجح في إنه يشتري Snapchat ولا هايكون ليه مصير تاني؟


ABC US News | World News

شارك على فيسبوك
شارك على تويتر
شارك على لينكدإن
+