لم علينا عبيدك يارب: مدخل إلى سلوك المستهلكين

شارك على فيسبوك
شارك على تويتر
شارك على لينكدإن
+

لم علينا عبيدك يارب ..

أكيد سمعت كلام كتير زي كده بيتقال من البياعين علشان يشد الناس إنها تشتري، طب لو انت عندك منتج او خدمه عاوز تبيعها؟ .. أول حاجة من الحاجات اللي لازم تفكر فيها انك تعرف المراحل اللي بيمر بيها أي مستهلك علشان يشتري السلعة او الخدمة اللي بتقدمها واللي هي بنقول عليه:  Consumer Buying Behavior = CBB

يعنى إيه ولا مؤخذه؟

ده اللي هو السلوك الشرائى للمستهلكين واللي بيمر بـ5 مراحل. طيب هما إيه ال 5 مراحل دول؟

هقولك ياسيدى:

1- Need Recognition

2- Information Search

3- Evaluation of Alternatives

4- Purchase Decision

5- Post Purchase Behavior

هو أنا فهمت إن فيه 5 مراحل، بس مش فاهم حاجة برده! .. طيب هقولك على مثال بشكل بسيط أوي تخيل معايا لو إنك محتاج تشتري عربية ايه هى الخطوات اللي هتعملها علشان تشتري العربية دي؟

– أول حاجه هى انت محتاج تشتري ليه؟

لو عرفت تجاوب على السؤال ده يبقى انت حققت أول مرحله وهي  Need Recognition  اللى هى بتحدد فيها إنك محتاج حاجة تروح بيها مشاويرك ، وتخرج وتروح شغلك مثلا، والحاجة دي هي العربية.

do-i-really-need-internet-marketing

– نيجى بقى لتانى مرحلة اللي هي Information Search ” البحث عن المعلومات”

إنت خلاص حددت إنك محتاج عربية .. حلو .. أكيد هتسأل أصحابك اللي معاهم عربيات .. أو هتدور على مواقع العربيات على النت علشان تعرف معلومات أكتر  .. أو هتروح لمعرض عربيات وتسأله  ، وفي المرحله دى إنت بتكون بتجمع معلومات عن الحاجة اللي انت محتاجها.

Man Bending to Look into Large Cardboard Box

– المرحلة التالتة هي Evaluation of Alternatives “تقييم البدائل”

ودي هي المرحله اللي بتقييم فيها البدائل .. يعني بتقارن فيها بين العربيات علشان تطلع الأحسن حسب .. الحاجات اللي إنت أصلاً محتاجها ، ممكن يكون سعر معين أو حاجات معينة تكون موجودة في العربية اللي إنت هتشتريها.

Jewelry shop

– المرحلة الرابعه وهي Purchase Decision  ” قرار الشراء”

ودى المرحلة اللي بتكون فيها أخدت القرار .. إنك هتشترى عربية معينه .. وبتشتريها فعلاً

Senior couple shopping in grocery store

– المرحلة الخامسة والأخيرة

اللي هيPost Purchase Behavior .. مبروك ياعم .. انت اشتريت العربية وقدامك سيناريوهين:

1- إما تطلع العربية دى زى الفل؛ فهاتقول للناس انهم يشتروا العربية دى لأنها كويسة.

2- يا إما بقى لو طلعت مش زى ما كنت متوقع؛ فبالتالي هتقول للناس إن محدش يشتريها! .. يوو فييل لايك: إنك لبست في الحيطة.

Something's Fishy

وقبل ما نوصل للنهاية .. تعالوا نيجي للحتة العملية: سمعت عن موقع consumerbarometer اللي عملته Google .. لأ؟. طيب تعالى نبص عليه:

أول ما تدخل على الويب سايت هاتلاقي المنظر ده، طبعاً إنت هاتيجي على كلمة Browse:

جوجل

عشان تلاقي مجموعة كبيرة جداً من المعلومات متقسمة في أربع مجموعات:

  • What is the role of search engines in the purchase process = يعني إيه دور محركات البحث زي جوجل وبينج وياهو سيرش في عملية الشراء

 

جوجل2

وده بيجاوب على سؤال: كام واحد من اللي قاموا بعملية الشراء استخدم محركات البحث في مرحلة جمع المعلومات حسب المنطقة الجغرافية؟ .. تقدر تختار بالقارة ، بالدولة ، وكمان بالصناعة ، وبالمنتج. وتقدر تفلتر بالنوع (رجالة – ستات) ، بالسن ، بالتعليم ، باستخدام الانترنت (بكثافة – قليل) عشان تعرف السلوك الشراء ، وتفهم منه حاجات كتير جداً.

  • Compare purchase behavior across countries = قارن بين السلوك الشرائي بين الدول

 

جوجل3

وده بيجاوب على سؤال: كام واحد من قاموا بعملية الشراء أونلاين -من خلال الإنترنت- على حسب الصناعة/المنتج؟ .. تقدر تختار بالقارة ، بالدولة ، وكمان بالصناعة ، وبالمنتج. وتقدر تفلتر بالنوع (رجالة – ستات) ، بالسن ، بالتعليم ، باستخدام الانترنت (بكثافة – قليل) عشان تعرف كام واحد بيشتري من على النت قبل ما تقرر تعمل ال e-commerce ، وتفهم منه حاجات كتير جداً.

  • How do consumers research and purchase products = وده بحث أكثر تفصيلاً عن سلوك البحث والشراء أونلاين

 

جوجل4

  • See how consumers access the internet = ازاي الناس بتدخل على الإنترنت

 

جوجل5

ومنه بتعرف كام واحد بيدخل الإنترنت ، وكام نسبة اللي بيدخلوا من موبايل أو بروودباند ، وأنواع مستخدمي الإنترنت: مؤثرين – بيدوروا على المعلومات – محبي التواصل .. إلخ.

– تقدر تدخل على الموقع من هنا .. هو صحيح معمول من 2003 ، لكنه هايفيدك جداً في أي بريزنتاشن هاتحضرها في الحتة ديه.

فى النهاية لو انت عندك منتج أو خدمة بتقدمها: 

1- لازم تكون عارف سلوك المستهلك إزاي بيفكر، إزاي تخليه محتاج للمنتج بتاعك ، دوّر على الأدوات tools اللي تساعدك في ده.

2 -ازاى تقدر تكون موجود وقت ما يحتاج معلومات يلاقيك، تعرف هو بيدور فين على المعلومة، و تعمل إعلان في المكان ده أو تظهر فيه.

3- إزاى يكون عندك الميزة التنافسية اللي تخليه يختارك من وسط كل البدائل.

4- واحدة من الحاجات المهمة لما العميل يشترى المنتج بتاعك مش معناها خلاص؛ لأ.. لازم تخدمه اكتر لأن العميل ده؛ هيبتدى يتكلم عن تجربته للناس سواء بالإيجاب أو بالسلب.

شارك على فيسبوك
شارك على تويتر
شارك على لينكدإن
+