انترفيو: “أحمد عماد” وتفاصيل رحلته لتصميم Cover album ل Pink Floyd

شارك على فيسبوك
شارك على تويتر
شارك على لينكدإن
+

حلم وابتدى من 10 سنين، حلم كان مخطط ليه وماشي ناحيته بخطوات ثابتة. حلم كان شايفه من قبل ما يوصله، كان حاسس بكل تفاصيله وبالفرحة اللى هيعيشها يوم ما يحققه. من البداية وهو واخد عهد على نفسه إنه هيشتغل وهيطلع أحسن ما عنده علشان يحقق كل اللى بيحلم بيه. أحمد عماد هو بطل قصتنا، تم عشرين سنة لكنها مش مجرد رقم، دي سنين من الجهد و التعب والمثابرة والإصرار وفي النهاية كان النجاح حليفه.

أحمد عماد قبل مايتم 18 سنة كان محقق واحد من أهم الإنجازات في حياته وهو تصميم Cover album ل Pink Floyd.

* عمل أول بوستر لفيلم وهو فيلم اشتباك.
* شغله اتعرض في أكبر مجلة للفنون في البرازيل، وكمان في أكبر مجلة أمريكية في العالم للفوتوشوب، واتعرض في مجلات تانية معروفة زي Newsweek.
*  تم اختياره كواحد من أحسن الفنانين تحت سن 25 على مستوى العالم.
* اتكتب عنه في  CNN – The Independent – Vice – Mirror – Time – BBC – The Guardian – Fox News وأشهر المواقع الإخبارية داخل وخارج الوطن العربي وعمل حوار مع صحفي راح ليه مخصوص من ألمانيا لصحيفة Süddeutsche Zeitung
* أخد جايزة Platinum Award من بريطانيا.
* شغله  اتعرض على مسرح Microsoft في مهرجان Adobe MAX السنوي قدام أكتر من 7000 شخص.
* شغله أصبح طابع بريد رسمي بيتم استخدامه وبيعه من الـ Royal Mail في بريطانيا.

14729382_1120390708015232_574422112239866027_n

حبينا في إعلانجي نحتفل بأحمد في عيد ميلاده ال20 وعملنا معاه الحوار ده:

إزاي كانت البداية؟

من أول يوم ليا على الكمبيوتر كنت شغوف بالإنترنت والمواقع والمنتديات جدا ونفسي أعمل موقع شخصي ليا أو منتدى يعني كنت بدخل على مواقع ومنتديات بقول لنفسي طيب ليه ادخل على موقع بتاع حد؟ ليه معملش أنا الموقع ده ويبقى بتاعي والناس هي اللي تدخل عليه مجرد فكرة يعني أو تجربة حبيت أعملها وفعلا بدأت أعمل مواقع ومنتديات وعملت أكتر من موقع ومنتدى. خلال الفترة دي وبعدها كنت بحتاج شغل ديزاين للمواقع أكيد كنت بلجأ إني أكلم ناس أصحابي أو ناس بتشتغل، محبتش الموضوع خصوصا إنه كان صعب وبياخد وقت ومش بعمل اللي عاوزه برضه. قررت اتعلم واتعلمت وعملت اللي أنا عاوزه لنفسي بس حبيت الموضوع أكتر وقررت اتعمق فيه بشكل أوسع خصوصا لما شوفت شغل الأرت اللي الناس بره كانت بتعمله لأنه مكنش منتشر في مصر نهائي وتقريبا محدش بيعمله كله متجه لمجالات ربحية زي الشعارات وغيره.

14117873_1071597636227873_1254838992222666937_n

فاكرأول ديزاين عملته؟

مش فاكر بالظبط كان إيه أول حاجة عملتها وخرجتها من البرنامج كشغل بس فاكر أول أرت زي اللي بعمله دلوقتي هو مش عندي للأسف بس كنت بجرب أعمل زي ما الناس بتعمل برا وعملت حاجة قريبة شوية مكنتش بنفس المستوى أكيد بس اللي شوفته عملته بفكرة تانية خالص وده اللي أنا فاكره وكان بالنسبالي حاجة مختلفة تماما عن اللي كنت بعمله.

أهلك كانوا بيشجعوك في الأول قبل ما تبقى عارف خطواتك الجاية كويس، وقبل ما يكونوا شايفين ده؟

جدا! حتى والدي ووالدتي من كتر ما إنهم كانوا بيشجعوني والدي في يوم جه قالي أنا هسجلك في كورس فوتوشوب في مركز معروف عشان يبقى معاك شهادة في اللي بتحبه وتتعلمه رغم إني كنت فعلا متعلمه وقتها ومش محتاج بس هو حب يقدم أي حاجة عنده يقدر عليها.

لا فعلا أهلي كانوا دايما بيدعموني وبيشجعوني إني أكمل.

14222234_1089481107772859_1830557595608357846_n

أكيد اتعرضت لإخفاقات، أحكيلنا على أكثر موقف مؤثر معاك؟

الإخفاق بالنسبالي كان نقطة تحول مش أكتر .. فاكر دايما في أول فترة خالص لما كنت بحاول أعمل مواقع ودايما بتحصل معايا مشاكل ومش بعرف أعمل حاجة للأخر وبقعد أكلم ناس عشان أعرف منهم إزاي ناس ترد وناس لا.

نقطة كده وقولت الواحد يعتمد على نفسه أول حاجة وبعدين يبقى يشوف الناس ويسأل أو يمشي الإتنين مع بعض مش مشكلة بس دايما يحط اعتماده على نفسه فوق وقبل أي حاجة.

نقدر نشوف أوحش تصميم عملته من وجهة نظرك؟

أنا مش شايف إني عملت حاجة أقدر أقول عليها وحشة أو هي أقل حاجة لأن كل حاجة بعملها بتكون في نظري أعلى حاجة لأن هي أفكاري في الوقت ده ومشاعري مش أكتر ومش بخرج حاجة أو بعمل save غير وأنا راضي عن اللي أنا عامله وإنه طلع زي ما في خيالي إن كان شكل أو فكرة أو معنى.

14333624_1092938657427104_7860199213491955_n

بتتعلم إزاي؟ بالممارسة، أونلاين، على إيد متخصصين؟

انا اتعلمت وبتعلم وهتعلم من يوتيوب وأي موقع بنفس الشكل كده وطبعا التعليم كده عبارة عن ممارسة لأن إنت لازم تشوف و تطبق بنفسك وتجرب وتتعلم وتغلط وتجرب وهكذا وطبعا منكرش إني بكلم ناس كبيرة برا وجوا عشان استفيد منهم مش شرط إني أقولهم عملتوا الحاجة دي ازاي مش دي هي الاستفادة بس .. الاستفادة والتعليم ممكن يكون في تفكير اللي قدامك.

“بينك فلويد” إيه التغيير اللي حصل في حياتك من اليوم ده تحديدًا؟

كل حاجة اتغيرت فعلا كان يوم معملتش حسابه رغم إني عارف من قبلها بكتير ومتوقعتش إنها هتوصل لكده قولت أخرها مجرد كام مقال وكام حد هيعرف وصحابي هيقولوا مبروك وانتهى! بس لقيت كل حاجة اتغيرت مجرد ما الAlbum Cover نزل جالي في وقتها اكتر من 20 ميل من أكبر المواقع في العالم للأخبار من CNN لـ Independent لـ Guardian وطبعا غير الشركات الكبيرة زي Adobe وناس وشخصيات عامة جوا وبرا

الموضوع فعلا غير كتير وحطني في مكان تاني وخلاني عندي طموح أكبر وأكتر إني اشتغل وأحسن من نفسي كمان وإني أفضل اشتغل لحد الآخر وده اللي بعمله وهعمله.

14910319_1137640372956932_8902168177816843903_n

الطموح دايمًا هو المحرك، وممكن يكون قاتل لما يتحقق بسرعة، إزاي فكرت في خطواتك الجاية بعد اللحظة دي؟

كلام مظبوط جدا .. بس أنا أخدت الموضوع بشكل مختلف تماما. بمعنى إني قولت طالما حققت حاجة أنا بالعكس مش ملزم إني أفضل أحقق في حاجات تانية وخلاص مجرد إني ماكينة تحقيق إنجازات أنا شخص بعمل اللي بحبه وربنا كرمني بحاجات أحمده كتير واشكره عليها ده يخليني أكمل شغل وأنا مبسوط وشايف إني عملت حاجة وممكن اعمل حاجة أكبر وأحسن قريب.
خطواتي الجاية مفيش حاجة في دماغي غير إني أمشي قدام وخلاص وافكر ازاي أحسن من نفسي وشغلي واعمل حاجة جميلة تريحني نفسيا أهم حاجة.

إيه مصادر إلهامك؟ وواخد مين رول موديل في حياتك؟

كل حاجة حواليا حرفيا، أنا مش حاطط شخصية معينة قدامي وواخدها رول موديل الموضوع كله إني بحاول دايما أشوف الكويس في كل شخص واحاول اتعلم منه.

مين أكتر شخص/ كيان / براند نفسك تصممله حاجة؟

مش عارف حقيقي .. هو كان Pink Floyd لأن معروف قد إيه الالبوم ارت بتاعهم بيكون على مستوى معين وهما معروفين بده على مستوى العالم والحمد لله اتحقق .. أنا فعلا احب اشتغل مع أي حد أو أي كيان بيعمل حاجة بجد .. بحب الفن جدا على أي مستوى.

بتتعلم إيه جديد دلوقتي؟

بتعلم كذا حاجة جديدة وناوي إن شاء الله أدخل في مجالات تانية بالإضافة إني بحسن مستوايا وشغلي في المجال بتاعي.

إيه هي ال tools اللي بتستخدمها في شغلك؟

انا بستخدم لاب توب Macbook Pro 13.3 و Wacom Intuos 5 بس.

بتشتغل فين دلوقتي؟

محصلش إني اشتغلت في مكان وارتبطت بيه دايما بيكون شغل Freelance.

وهل بتفضل الشغل ضمن كيان، ولا فري لانس؟

أنا مجربتش اشتغل وسط كيان بس أنا مبسوط بشغلي كفري لانس ومريحني جدا التعامل كده ومريحني خصوصا إني حاليا بدرس في صيدلة فمش سهل إني ارتبطت حتى بكيان أو مكان معين.

بتقضي أكثر وقتك فين، وفي إيه؟

معظم وقتي بيكون في البيت في أوضتي على اللاب توب بشتغل أو بتعلم أو بذاكر على حسب أنا الفترة دي عليا إيه أكتر.

أول ما بتصحى من نومك بتعمل إيه؟

غالبا بشوف الموبايل والميل، وبقوم أكمل لو في شغل كنت مش مكمله قبل ما أنام.

إيه أهم نصيحة اتقالت ليك وفرقت معاك؟

إوعى في يوم تبص لغيرك وارضى باللي في إيدك ومعاك، واعمل اللي بتحبه وحاسه ومتسمعش لحد.

وإيه هو أكثر سؤال بتتسأله؟

ازاي وصلت لـ Pink Floyd؟ وازاي ابدا في المجال ده؟ وبالنسبة لردي على السؤالين Pink Floyd هما اللي وصلوا ليا لما شافوا شغلي أون لاين وكلموني، إزاي الواحد يبدأ في المجال يوتيوب فعلا هايل .. عليه كل حاجة وانا بدأت من عليه.

13939395_1062759490445021_8278778159783065190_n

إيه النصيحة اللي تقدر تقدمها لأي حد بيبدأ في المجال جديد؟

إنه يتفرج كتير ويعتمد على نفسه ولو ناوي يكون فنان يحط إنه يمشي في طريقه وميبصش لحد غير لما يكون ديزاينر بيوجه شغله لناس لازم يتفرج ويعرف يوصل اللي هو عاوزه للناس، يشتغل كتير جدا ويحدد هدفه من الأول هو عاوز يكون إيه أو يعمل إيه ميسيبش الدنيا عايمة، ويحاول يعمل الموضوع ده بدري عشان ميضيعش وقته على الفاضي بس لازم يكون مرتاح طبعا يعني يعمل كده وهو جرب كل حاجة على راحته بس يحط في باله إنه ميزودش الفترة دي عشان يدي لنفسه فرصة يتعلم في الحتة اللي هيحبها او هيلاقي نفسه فيها أكتر.

كمان إنه ميسمعش كلام الناس حتى لو حب مجال مفيش حد في مصر ولا في الدنيا بيشتغله أو حتى عمل حاجة مختلفة تماما

عادي جدا .. المهم إنه حاسس ده وحابب ده في يوم من الأيام ممكن يكون دي بداية مجال كامل إنت عملته وحققته

بالظبط زي أنا في مصر أول ما بدأت أعمل كده كله قالي شغل أهبل ومش بيأكل عيش وبتعمل إيه بس وياعم اشتغل زينا عشان تاكل عيش بدل العفاريت واللوحات اللي بتعملها بس بعد اللي حصل غيروا رأيهم وفهموا الحتة دي.

نشكر أحمد على المقابلة ، ونتمناله التوفيق والنجاح والتألق دايمًا، كل سنة وانت طيب يا أحمد.

شارك على فيسبوك
شارك على تويتر
شارك على لينكدإن
+