10 نصايح مهمة للناس اللي بتشتغل من البيت

شارك على فيسبوك
شارك على تويتر
شارك على لينكدإن
+

في الفترة اللي فاتت زاد جدا أعداد الناس اللي بتشتغل من البيت كـ freelancer  نتيجة زيادة المجالات اللي بتتيح الفرصة دي من تصميم، برمجة، سوشيال ميديا او كتابة، في المقال ده هنتعرف مع بعض على بعض النصايح اللي لازم  تاخد بالك منها لو كنت واحد من الـ freelancers  دول عشان شغلك يكبر وحياتك تبقى احسن :

١. اعمل لنفسك براند

 

 

personal-branding-1

كتير مننا وهو شغال فريلانسر متخيل انه مش مهم ان الواحد يخلق براند لنفسه ومش قادر يتخيل اهمية الخطوة دي في شغله، شغلك من البيت محتاج جدا انك تعمل لنفسك براند قوي عشان المنافسة بقت قوية جدا ومش بتكلم عن المصمم بس انه يعمل لنفسه لوجو وخلاص ، لا الاهم من كده الناس تعرف طبيعة شغلك وايه اللي انت محترف فيه وايه اللي انت عامل لنفسك فيه positioning  مثلا لو انت بتقول على نفسك مبرمج شاطر بس، يبقى غلط .. لازم تعرّف الناس انت مبرمج شاطر في ايه – مثلا – تطبيقات الاندرويد، وخلي الناس تحكي عنك من خلال تجاربهم معاك، اعمل موقع على الانترنت واعرض شغلك عليه وحط الـ projects  اللي انت بتفتخر بيها، واوعى تعرض حاجة انت مش راضي عنها.

ازاي تعمل Personal Brand مميز لنفسك في 5 خطوات؟

 

 

 

٢. سوشياليز واخلق شبكة معارف

 

 

source : hbr.org

بعد ما عملت الموقع التمام وقدرت تعرض كام مشروع من اللي على الحبل علي الـ portfolio  بتاعك دلوقتي جه وقت انك تـ Socialize وتعمل شبكة معارف قوية من ناس في نفس مجالك، مجالات ليها ارتباط بمجالك، و زباين محتملين.

: يمكن دي من اهم النقاط اللي انت لازم تهتم بيها وانك تعملها لنفسك وتطورها، لاسباب كتيرة ممكن نذكر منها:

 – هتتعلم من ناس خبرة في مجالك

 – هتتعرف على ناس بيكملوا شغلك ( مثلا لو انت مصمم تطبيقات، المبرمج من صحابك اللي لازم تتعرف عليهم).

 – هيفتحلك فرص شغل في مشاريع جديدة كتيرة.

 – كفاية انك تلاقي مجموعة من الناس بتتكلم نفس لغتك.

ماتنساش انك تحرص انك تقابل الناس دي على الارض مش مجرد شبكة تعارف على العالم الافتراضي.

٣. اتعلم تقول لأ

 

source: lifehacker.com

المشكلة الأزلية لكل واحد بيشتغل فريلانسر ان الناس متخيلة انه متاح في كل وقت وفي اي مكان، ماهو “فري” بقى، وهنا افتكر حدثة حصلت بحق وحقيقي من زبون غلس جدا لمصمم اجنبي كان بيحكي عليها انه بعتله ايميل بيقوله هتدفع اللي عليك امتى قاله انا ادفع ليه ؟! انا اتعاملت مع واحد Freelancer  لو كنت عايز ادفع كنت اتعاملت مع واحد Paidlancer   J
اتعلم تقول لأ للناس اللي بتقولك يا علي لو سمحت اعملنا اللوجو ده ده مش هياخد منك دقايق، اتعلم تقول لأ لزميلك في الكلية اللي اتصل بيك بعد 5 سنين عشان تعمله بوستر “بالحب” … اتعلم تقول لأ لمشروع انت مش حاسس انه هيطلع حلو.. اتعلم تقول لأ لزبون غلس بيطلب تعديل للمرة ال 50 من غير اي تكلفة زيادة..
وقتها هتحس ان وقتك ليه قيمة وانك مش مضغوط.

٤. اخلق مساحة عمل مناسبة

 

source: fastcompany.com

ما اخبيش عليكوا اسوء حاجة ممكن تمنع مصمم / مبرمج / او اي فريلانسر انه يشتغل انه في مكان مش مناسب للشغل، حتى الناس الفوضوية شوية زي حالاتي J عشان كده لازم تخلق وتصمم مساحة عمل ليك جوه البيت تناسب شغلك وياسلام بقى لو حطيت فيها  لمسات مبدعة تخليك دايما نفسك مفتوحة للشغل، حاول تحط كل حاجة هتحتاجها قدامك وماتخفش تستثمر في اجهزة مفيدة لك زي ال printer او الـ scanner  او اي حاجة تانية هتفيدك، كله في الاخر هيصب في ناحية انتاجية شغلك اللي هتحس انها بتزيد.

استفيد من أجمل ميزة في شغلك ك freelancer انك تاخد مساحة عملك لاي مكان تحبه، عايز تروح تشرب قهوة في مكان لطيف خد اللابتوب بتاعك وانطلق، بس ما تقولش لحد انك رايح J.

٥. خلي الناس تحترم ساعات شغلك

 

source: wordstream

طول مانت في البيت يبقى انت معرض لاي انتهاكات اسرية لشغلك J هتلاقي الحاج او الحاجة او مراتك كل شوية بيسألوك بتعمل ايه يا عمرو ؟ ويعني ايه براند اتتاك اللي انت شاغل بالك بيها؟ يعني ايه …. والأسئلة مش هتقف وشغلك هو اللي هيقف، خلي الناس تحترم اوقات شغلك المقدسة اللي ما بينهم اوقات راحة تقدر تتفاعل مع كل حاجة زي مانت عايز في البيت، وده بيخلينا نرجع للنقطة اللي قبلها، مساحة عملك لازم تكون بعيدة عن اي مصدر للدوشة والإلهاء وتكون مقدسة.

٦. انزل من البيت كل يوم

caminar

لو انت من الناس اللي ما بتحبش الشغل في اماكن عامة زي الكافيهات مثلا، يبقى لازم تاخد بالك ان شغلك في البيت كتير ممكن يأثر على مودك وده طبعاً ضد مصلحة الشغل ومش محتاج مني اني اقولك انه بيضرك على الجانب النفسي، لازم تخرج كل يوم حتى لو لفترة قصيرة تعمل اي نشاط، خد عندك مثلا ممكن تعمل ايه:

  • ممكن تجري تتمشى
  • تقابل واحد صاحبك تقعدوا على كافيه
  • تروح زيارة عائلية
  • تنزل تاكل ايس كريم J
  • تنزل تجيب البقالة J
  • إلخ.

 

 

٧. سافر من فترة للتانية

 

source: forbes.com

مش بس مهم انك تخرج كل يوم عشان النفسية J، من فترة للتانية لازم تسافر اي حتة تاخد اجازة من شغلك ومن الايميلات ومن مكالمات الشغل، تريح دماغك وتدور على Inspiration  جديد.
اقرا المقال ده عن ال inspiration لاحمد جبريل هيفيدك جدا.

ولما بقول تسافر أي حتة مش معناها انك تسافر برة مصر، ممكن تسافر اي حتة جوه مصر وهتنبسط جدا جدا فوق ما تتخيل، ممكن تتسافر لرحلة لسيوة، تطلع جبل موسى في سانت كاترين، تقضيلك كام يوم في دهب او تروح لأسوان وتشوف جمال النوبة… مصر فعلا حلوة J
مالكش حجة.

٨. اسرتك ليها حق عليك

 

Man working from home with baby

Man working from home with baby

مش صح انك تحط اوقات مقدسة لشغلك وتهمل التواصل مع اسرتك اذا كان والدك، والدتك، اختك، اخوك ولو متجوز مراتك وولادك، التوازن بين شغلك وحياتك الشخصية من اهم التحديات اللي هتقابلها زيها زي تحدي التواصل مع الزبون وانك تلاقي مشاريع جديدة.

زي ما هتحط اوقات مقدسة لشغلك لازم تحط اوقات زيها لأسرتك تمنع فيها اي عمل له صلة بشغلك من تليفونات وايميلات .. إلخ.

٩. نام كويس و اشتغل الصبح

 

Businessman Stretching While Working on His Laptop --- Image by © Royalty-Free/Corbis

Businessman Stretching While Working on His Laptop — Image by © Royalty-Free/Corbis

معنى انك Freelancer  انك مدير نفسك، كلام سليم بس مش معناه انك تبقى مش ملتزم ، اعمل لنفسك روتين يومي وحاول تشتغل الصبح بدري عشان تزود إنتاجيتك، نام كويس جدا وما تسهرش، ماتزودش ساعات عملك يومياً عن 8 ساعات زي اي شغل عشان دماغك ما تضربش.

 

١٠. ما تشتغلش بالبيجاما

 

 

working-from-home

ايوه اوعى تعمل كده، يمكن ناس كتير تختلف معايا في النقطة دي بس انا شايف انها نقطة مهمة جداً، الحالة النفسية اللي بتحط نفسك فيها وانت بتشتغل من اهم النقط، ولو حاسس إنك مريح بزيادة ومأنتخ مش هتشتغل ومش هتنجز، بس مش معنى كده انك تلبس حاجة متعبة، لا إلبس حاجة مريحة وفي نفس الوقت كأنك نازل تخرج مع صحابك مثلا، حاجة تخليك تدخل في مود الشغل دايماً وما تحسسكش بأنتخة.

كل النصايح دي مهمتها انها تدخلك في مود الشغل وتظبطلك دماغك ودماغ اللي حواليك تجاه شغلك، تزود إلهامك وترتبلك اوقات شغلك.

انت شايف في نصايح تانية ممكن الـ Freelancer  ياخد باله منها وهو شغال من البيت ؟

قولنا رأيك.

 

شارك على فيسبوك
شارك على تويتر
شارك على لينكدإن
+