دليل المصمم | خللي الصندوق على يمينك وانت خارج – 2

162
shares
شارك على فيسبوك
شارك على تويتر
شارك على لينكدإن
+
What's This?

اتكلمنا المرة اللي فاتت عن الإبداع وإزاي تعمل عمل مبدع -وده طبعاً من وجهة نظري المتواضعة- ، وقلنا إن في خطوات ممكن تعملها تسهل عليك العملية دي (تقدر تقرأ المقال من هنا) وبما إن اللي فات كان مقدمة للخطوات دي، فالنهاردة هابدأ بأولى الخطوات دي وهي خطوة: Inspiration يعني “الإلهام” أو “الوحي” !

 Field of Budding Light Bulbs

طيب أولاً يعني إيه الكلمة الغريبة دي: Inspiration ؟

الكلمة دي معناها بالبلدي كده “إنك تسخن دماغك” يعني تفضل توريها حاجات لغاية ما تشتغل!، بالظبظ كده زي ما بنشغل موتور الموتوسيكل  ولما يشتغل برتاح. والموضوع ده نوعين:

(1) إما انت بتعمل الخطوة دي عشان عندك شغلانة معين وعايز تجيلك أفكار فيها ..

(2) وإما بتعمل inspiration كل يوم الصبح وتغذي نفسك بأفكارعلي الريق كده (زي ما بننزل في إعلانجي على فايسبوك كل شوية إعلانات أفكارها جامدة) عشان تعود نفسك على الأفكار المطرقعة زي ما قولنا المرة اللي فاتت.


حاجة مهمة لازم تاخد بالك منها إنك بتشغل دماغك .. ها .. مش بتضرب شغل من حد يعني!. إوعي تنقل حاجة زي ما هي أو حتي شبهها ، إنت بتخلي دماغك تشتغل وبس ؛ بتوريها ألوان ، وأفكار ، أو طريقة رسم معينة ، أو كتابة بطريقة ما ، بس في الآخر لازم تكون إنت اللي عامل التصميم مش سارقه من حته وتاخد مجهود حد تاني تعب في الحاجة دي.


أولاً: لو بتعمل inspiration لشغلانة معينة:

ولازم تعرف إنها خطوة مهمة جدا وماينفعش تهملها أو تلغيها .. بل إنها ممكن تكون أهم خطوة في التصميم كله، ممكن تكون اهم من التصميم نفسه!، لأنها الخطوة اللي حتحدد إذا كنت حتعمل تصميم رائع ، ولا تصميم مقبول ، ولا تصميم سيئ. في الخطوة دي حاول إنك متعملهاش في خمس دقايق بس. حاول تاخد وقتك .. يعني نص ساعة أنا شايف ده وقت مناسب جداً والموضوع حسب سرعتك. إنت ممكن فعلا توصل للحاجة اللي انت عايزها بسرعة. المهم إنك لازم تعمل الموضوع ده صح لأنك لو فضلت ماشي بطريقة غلط حتلاقي نفسك عمال تلف حوالين نفسك و مش بتوصل لحاجة وساعتها طبعا العيون حتبقي عليك وتبدأ الاسئلة: هو بطيء ليه؟ هو كل ده لسه معملش حاجة؟ .. وهكذا.

والناس بتبقي فاكرة إن الأفكار عند المصمم بزرار مثلا ! ، يدوس على الزرار يلاقي الأفكار اشتغلت .. أو كل مصمم معاه كارتونة افكار متنوعة بيطلع منها اللي هو عايزه و معاه مقاسات كمان!.

وطبعا الكلام ده كله تخريف وكلام فارغ؛ مفيش حد عامل زي ماكينة أفكار .. كل الناس بييجي عليها وقت مش لاقيه فكرة لحاجة معينة أو معندهاش أفكار دلوقتي. الموضوع ليه علاقة بالحالة النفسية. والراحة وغيرها من العوامل. فلو معندكش فكرة لحاجة معينة اتطمن انت مش فاشل والمفروض تروح تشتغل مسحراتي مثلا!. في وقت الواحد بيلاقي نفسه عنده افكار كتير ممكن تجيله مثلا وهو بيصلي زي حالاتي.

الخطوات:

1- إعمل inspiration في اتجاه الحاجة اللي انت عايزها .. يعني لو حتعمل بوستر متتفرجش علي لوجوهات عشان متفضلش تحرق وقت علي الفاضي. إنت طبعا بتستفيد من كل حاجة بتشوفها بس دلوقتي إنت محتاج تركز تفكيرك علي حاجة معينة وهي نص ساعة لازم تمشي فيها صح.

2- قسّم تفكيرك لنقط أو عناصر .. وحاول إنك توصل لحل لكل نقطة يعني انا لو عايز أعمل لوجو يبقي أنا محتاج ألوان و محتاج شكل ومحتاج فكرة. (الكلام ده مثال انا بعمله في شغلي .. وبقوله عشان أوصلكم الفكرة بس ممكن يكون دماغك غيري أنا بقولك طريقة التفكير بس وإنت قسّم زي ما انت عايز).

انا بقول كده عشان انا مجرب الطريقة دي وجابت معايا فايدة جداً و طول ما إنت مرتب تفكيرك ومقسّمه لخطوات حتلاقي نفسك يتوفر جهد كبير أوي ووقت أكبر يعني من الآخر كده انت بتطبق مثل: “من أين تؤكل الكتف”

light bulb with the filament forming the word idea

 

ثانياً: لو بتعمل inspiration بشكل عام:

يعني داخل تتفرج علي الأفكار عشان تعود دماغك علي التفكير خارج الصندوق الملعون. أنا مش حاتكلم عن الطريقة دي كتير لأن فعلا كل واحد وطريقته وانا بصراحة معنديش طريقة معينة فيها غير اني بدخل علي موقع اسمه: Stumbleupon.com

 stumbleupon-submitter

و ده موقع فكرته إنك بتمشي في النت و بتتكعبل في الحاجات اللي إنت بتحبها. الموقع ده وصّلني لمواقع تانية جامدة جداً وعمري ما سمعت عنها ولا في حد من المصممين اللي أعرفهم سمع عنها وكمان بيخليك تعمل قوائم بالمواقع المفضلة ليك يعني ممكن تعمل قائمة مواقع الألون وقائمة لمواقع المطبوعات وهكذا.

من المواقع الرائعة اللي وصلتلها برضه من الموقع ده هو موقع: www.adeevee.com

 adeevee

وده عبارة عن أرشيف لكل الإعلانات الممكنة في العالم كله، تقدر تدوّر فيه بالبراند، وتقدر تدوّر بنوع الإعلان، وتقدر تدوّر فيه بكلمات معينة keywords، وتقدر تعمل save للإعلانات على جهازك ب high resolution. وهو أحسن من Ads of the world بالمناسبة.

الحلقة التانية خلصت، وأتمنى أكون غطيت الموضوع ده كويس .. وأكون أفدتكم. استنوني في الحلقات اللي جاية عشان نكمل خطوات التصميم المبدع.

شارك على فيسبوك
شارك على تويتر
شارك على لينكدإن
+