أكبر أزمة تواجه أي مدير تسويق

138
shares
شارك على فيسبوك
شارك على تويتر
شارك على لينكدإن
+
What's This?

لو سألت أي مدير تسويق ايه اكبر ازمة بتقابلك وانت بتحط خطتك ، هيقولك وانا بحط الميزانية .. البدجيت Budget .. والاسوء لما بعرضه ع الادارة. طب هو انا ازاي احط بدجيت و هل في طريقة موحدة ولا هي ماشية بالبركة كده؟

 

في كذا طريقة لوضع البدجيت وانت مفروض تستخدم الطريقة المناسبة للظروف العامة للبزنس و بتحاول تتعايش معاها عشان تنجح:

 

1) Task Method حساب تكاليف جميع مهام خطة التسويق:

و دي بيسموها من تحت لفوق down to up method يعني انت عامل خطة تسويق متكاملة زي اللي اتكلمنا عليها في المقال ده و جيت جمعت في الاخر كل المهام و حددت تكلفة كل حاجة و بعدها بتحسب الاجمالي.

طبعا في ناس بتقول ده حلم و مفيش شركة ادارتها بتوافق على كده، و ده حقيقي لأن اغلب الشركات بتستخدم الطرق التانية اللي هنتكلم عليها ، بس انت لازم كده كده تعمل ال Task Methods عشان تشوف الصورة كاملة و لو الادارة قصت من البدجيت بتاعتك هتقدر بسهولة تحدد اولوياتك ايه و تقدر تقلل تكاليف من ايه.

2) Competitive Parity التكافؤ أو المماثلة

يعني زيك زي غيرك، الادارة بتفرض عليك رقم معين بيكون زي المنافس بتاعك أو زي قسم تاني منافس ليك زي الناس اللي بتشتغل تسويق على خطوط انتاج معينة فيبقى كل ادارة خط انتاج ليها رقم ثابت مش بيتغير بناءا على الخطة ولا التوزيع.

و بالتالي هتلبس في رقم معين و هتفصل خطة تسويق بناءا على الرقم ده، فبالتالي لازم تكون عامل Task Methods عشان ترتب أولوياتك زي ماقلنا.

 

 

3) Percentage of Sales نسبة من المبيعات

و دي من اشهر الطرق و الاكثر استخداما في الشركات اللي بتعتمد على المبيعات بشكل كبير زي شركات الادوية و المأكولات و غيرها.

أكيد بتسأل طيب النسبة دي بتتحدد ازاي؟! هقولك ان النسبة دي متغيره حسب طبيعة البزنس و تخصصه و هل هو بزنس قائم ولا جديد.. بس معظم الشركات بتشتغل في حدود ال 2,5 % الى 5% من اجمالي المبيعات.

و بعض الشركات بتحسب النسبة دي من اجمالي المبيعات للسنة الماضية ، و البعض بيحسبها نسبة من المتوقع تحقيقة للسنة الجاية ، فبيقولك رقم انت بناءا عليه بتعمل خطتك.

 

 

4) All You Can Afford قدر المستطاع

يعني جيب اللي تجيبه المهم تدفع، يجيلك صاحب الشركة يقولك معييش غير دول انت بقا تتشقلب بيهم، و دي غاليا بتحصل فى ال Start Up Business لان صاحب العمل بيبقى تكاليفه على قد راس المال و مش قادر يصرف كتير، و طبعا زي ما قلنا بتكون انت عامل Task Methods و بعدها ترتب أولوياتك.

 

 

5) S.A.L.T (same as last time) زي المرة اللي فاتت

و دي اكتر طريقة بتستفزني شخصيا، لانه بيقولك احنا السنة اللي فاتت مثلا صرفنا كذا يبقا هو هو الرقم تصرفه السنة دي، و هي طريقة سيئة لأنها مش بتراعي أي تغيرات بتحصل في السوق ولا بتراعي النمو اللي بيحصل في البزنس اللي بيخليك تحتاج تعمل انشطة تسويقية اكثر و بالتالي تصرف أكثر.

 

 

و في بعض الشركات بتجمع بين طريقتين، يعني مثلا شركة start up بتاعت مجموعة شباب عملوا All you can Afford مع Percentage of Sales يعني قالوا لمدير التسويق انت ليك عندنا 50 الف جنيه بس لو حققت مبيعات تخطت ال100 الف في الشهر هنديك 2% من المبيعات على البدجيت بتاعتك.

 

من الاخر أي طريقة لازم تكون عامل قبلها Task Methods عشان تبقى شايف الصورة العامة وتعرف تاخد قرارات سليمة و ترتب أولوياتك صح، و مدير التسويق الناجح يقدر يشتغل تحت أي ظروف و بأي قيمة للبدجيت بس طبعا النجاح ده نسبي يعني كل ما البدجيت تكون مكافئة لل Task Methods يبقى النجاح بيزيد.

شارك على فيسبوك
شارك على تويتر
شارك على لينكدإن
+