Ice Bucket Challenge أربع أشياء نتعلمها من تحدي دلو الثلج

شارك على فيسبوك
شارك على تويتر
شارك على لينكدإن
+

تنويه: أنت الآن تسير بسرعة تتجاوز سرعة الضوء، وبالتالي تتعرض لظاهرة إسمها التمدد الزمني، مما يعني أنك سافرت بالزمن إلى الوراء، تحديداً إلى يوم 27 أغسطس 2014 لقراءة هذا المقال:  

أهم ميزة المفروض تكون عن المسوق انه يكون “ودان” يعني بالافرنجي كده Active Listener  او مستمع فعال، و دي صفة بتتقال على الشخص اللي بيجمع معلومات و بيتفاعل معاها. يعني انت كمسوق لازم تفضل تجمع معلومات عن العملاء و التغيرات في السوق و اداء المنافسين و كمان الجديد في التسويق و الحملات اللي بتتعمل على مستوى العالم و اسباب نجاحها و اسباب فشلها.
النهاردة هنتكلم عن حملة من أشهر الحملات اللي حصلت في الفترة الاخيرة و اللي حققت أهدافها المادية الى جانب الاهداف الخاصة بالانتشار و ربط العملاء بالحملة Engagement  ، و هنتكلم عن اهم الدروس العملية المستفادة من الحملة دي ، الا وهي Ice Bucket Challenge  .. الحملة دي اللي لو عملت بحث في Youtube  هتحس ان في ظاهرة مش طبيعية يعني مش مجرد حملة تسويقية.
الحملة دي كان هدفها حاجتين :

1- التوعية عن مرضى ALS  الي بيخلي اطراف الجسم فيها خلل يشبه الاحساس بتاع لما التلج يلمس الجسم و بعدها تحس ان اطرافك متخدرة و من هنا جات فكرة الحملة
2- جمع التبرعات للمرضى المصابين بالمرض ده و المبهر انهم جمعوا اكثر من 80 مليون في شهرين.

طيب ايه اللي خلى الحملة دي تنتشر بالشكل ال Viral ده ؟ و ازاي تقدر تعمل كده في شركتك؟

الحقيقة القائمين بالحملة استخدموا مجموعة من المبادئ او المفاهيم Concepts  اللي بتهم العملاء المستهدفين:

1- حرية المشاركة Personalize Participation

مش كل اللي شارك في الحملة دي شارك بنفس الطريقة و كمان كانوا عاملين طريقتين للمشاركة اما انك تدخل تحدي Ice Bucket او انك تتبرع للمرضى . و المبدأ ده مهم جدا عشان بيدي مساحة لكل واحد يشارك بطريقته اللي تناسبه و اللي تخليه يرتبط بالحملة.

الدروس العملية المستفادة:

# تسهيل المشاركة على الناس في حملتك عشان تزود عدد المشاركين

# خلي المشاركة فيها نوع من المرونة عشان هيزودلك ال Engagement

w1

2- استغلال طاقة الناس Power of peer Pressure

من اهم اسباب الحملة دي انها كان فيها استغلال لطاقة الناس الايجابية التنافسية فكان كل واحد بيشارك بيعمل تاج لواحد تاني عشان يتحداه سواء كان صديق أو مماثل أو منافس ، و طبعا المنافسة العلنية على ال Social Media بتخلي المنافس هو كمان يحط الفيديو على ال Social Media و يطلب تحدي واحد تالت و هكذا.

الدروس العملية المستفادة:

# استغل طاقة العملاء و خلي حملتك تنتشر من شخص لشخص لان الناس بتثق في اراء بعض

# لازم تكون عندك رسالة معينة موجهة واضحة تخلي الناس تنشرها

و ده بيتسمى في العلم Advocate Marketing و كنا اتكلمنا عليه بالتفصيل في المقال ده.

icebucket-640x360

3- استغلال الشخصيات العامة Celebrities

مدير الحملة دي كان ذكي جدا لانه اتوجه للناس المشهورة في العالم عشان يشاركوا و يتحدوا بعض اللى خللى اي حد مستحيل ميلاقيش شخص او اتنين يكونوا شاركوا من اللي بيحبهم و بيعتبرهم قدوة ، زي مثلا بيل جيتس و كريستيانو رونالدو و كتير من الرياضيين و الفنانين و العلماء و رواد الاعمال. لأ و مش بس كده ده مخللي الناس متابعة بقى ياترى فلان المشهور هيتحدى مين من المشاهير.

على فكرة انا زيك ممكن اكون حاسس ان الموضوع تافه ، بس طالما ان دي دماغ العميل و دي الطريقة اللي هتنجح حملتك يبقى مع احترامي لدماغك فان هي دي الطريقة اللى هتنجحك. و افتركوا الجلاشة اللي حصلت مع مرسيدس اللي اتكلمنا عليها في المقال ده

الدروس العملية المستفادة:

استغلال المشاهير في حملتك التسويقية هيكسبك حاجات كتير:

# انتشار حملتك في وسط المشاهير

# تفاعل اكثر من الجمهور العام

# تغطية اعلامية لحملتك و لمشاركة الشخص المشهور (ودي من اكتر الحاجات اللي بتنجح الحملات)

بس مش معنى كده ان لو عندك بزنس مستوصف صغير هتروح تعمل حملة مع عمرو دياب ! .. لازم يكون فيه تناسب عشان متجيبش عميل غلط او ان الناس متقتنعش بالحملة اصلا. لازم تفكر بدماغ العميل و تعمل حملة متناسبة مع ثقافته و فكره مش مع طريقة تفكيرك انت.

946790-ef984690-2991-11e4-90e1-17d1dbb99f76

4- خليك خفيف و مرح Funny Campaign

اختيار توقيت الحملة و فكرتها اللي فيها Fun كانوا احد اسباب النجاح لأنهم اختاروا اكثر فترة شديدة الحرارة على معظم دول العالم و ده زود الFun في الحملة لانك لما بتتفرج على الفيديوهات بتحس انك عايز تعمل زيهم عشان تتخلص من الحر.

الدروس العملية المستفادة:

# خلي حملتك فيها جزء من المتعة و المرح عشان الناس بطبيعتها بقت بتميل لكده مش زي زمان لما كنا شغالين على الصعبانيات  و اتبرع و لو بجنيه ولا احكيلكم حكاية ام أحمد.

حقيقي حملة Ice Bucket Challenge  من انجح الحملات و محتاجة تفكير و “عمق” عشان تستفيد منها اكتر. المهم انت خليك “ودان” و استفيد من خبرات غيرك. و اكيد كل واحد فينا شاف حملة عجبته و بيحاول يطبق فكرتها و الدروس اللي اتعلمها منها في شغله ، شاركونا بخبراتكم واللي اتعلمتوه.

شارك على فيسبوك
شارك على تويتر
شارك على لينكدإن
+