انترفيو مع “علي عزب” أحد صناع إعلان دايس فى رمضان

شارك على فيسبوك
شارك على تويتر
شارك على لينكدإن
+

فاجئنا براند “دايس Dice” بإعلان جديد السنة ديه في هجوم صريح على “القطن بيتكلم مصري” لقطونيل، عشان كدة وصلنا للرجل اللي ورا الحملة الجديدة وعملنا معاه الانترفيو ده:

ممكن تعرفنا بنفسك؟

علي عزب ، ٢٤ سنة ، بدأت بالتصوير كفوتوجرافر لفترة فريلانس واشتغلت فترة سيلز لحد ما دخلت Mahdys واتشغلت كوبي رايتر و ممثل فى إعلانات تانية. اشتغلت على اكتر من إعلان منهم: ماكسبون “خد فشار” و”كرانشى فى تايلاند” و “روتيتو” ..  وبعد كده كان في فترة كنت فيها فريلانس كان فيها اعلان اتصالات اللى كان في “سلافى مع الطبيعة” وأخيرًا دايس.

احكيلنا يا علي أكتر عن دورك فى اعلان دايس؟

فى إعلان دايس دورى فيه كان كوبي رايتر و ممثل “الدكتور النفساني” .. ودى مش أول مرة اكون ممثل و كوبي رايتر كنت كده فى اعلان أتصالات “السلافي مع الطبيعة”.

ممكن تكلمنا اكتر عن كونسبت اعلان دايس  وايه اللى حمسك لأنك تشتغل عليه؟

 إنه يبقى إعلان مافيش فيه منظر مش لطيف و لفظ مش جارح و فى نفس الوقت يبين ال features بتاعة المنتج. اللى شجعنى ليه انه إعلان لملابس داخلية و ده مش موجود كتير وانا هيكون competitive ad  .. بغض النظر ان الناس فى مصر لسه مش متعودة أوى على compatitive ad مع انها موجود برا و تتعمل عادى و الناس بتحبها و بتحصل كتير بين ما بين بيبسي و كوكاكولا.

وكان ايه أكبر تحدى واجهك فى الاعلان و الاعلان خد وقت قد ايه تقريبا؟

أكبر تحدى هو ان ده إعلان لملابس داخلية .. و الناس عندها فكرة عن اعلانات الملابس الداخلية ان لازم يكون فيها ايحاءات او كلمات معينة و كان هدفى فى الإعلان ده انه اغير فكرة الناس عن الإعلانات الملابس الداخلية و يبقى إعلان بشكل محترم و بيوصل اللى احنا عاوزينه و محدد بعيداُ عن اى حاجة أو اى كلمات الناس ممكن تفتكرها و تنسي الإعلان كان عن ايه زى ما حصل فى إعلانات تانية.

 طيب .. ايه عناصر الإعلان الناجح من وجهه نظرك؟ 

 انك تكون عارف الكونسبت بتاع الإعلان ايه و ايه اللى الإعلان عاوز يوصله بالظبط .. لأن فى ناس بتتجه انها تعمل إعلان التصوير فيه حلو و فيه ايفيهات ولكن الناس فى أخر الإعلان بتطلع فاكرة الإيفيه و تنسي المنتج نفسه.

وهل دايس هتنزل اعلانات تانية فى رمضان ؟

دايس لحد دلوقتى نزلت اعلانين رجالى و واحد تانى حريمي .. الأول كان عن أن القطن مابيتكلمش .. الثانى كان عن الأستك .. الثالث كان حريمي.

ومن وجهة نظرك .. اد ايه بيساهم الاسكريبت اللى مكتوب صح فى نجاح الإعلان؟

من وجهه نظرى ٩٥٪ .. لأنك بالاسكريبت بتوصل بيه الرسالة اللى أنت عاوز توصلها للناس.

بالنسبة لك يا علي ..  ايه احسن اعلان شوفته فى رمضان لحد دلوقتى؟

 يمكن لحد دلوقتى مافيش حاجة علقت معايا ولسه فى إعلانات كتير هتنزل الفترة اللى جاية  .. ولكن لو على مستوى البرامج ممكن برنامج “الصدمة”.

أخيرًا .. ايه نصيحتك لأى حد لسه بيبدأ فى مجال الاعلانات؟

 دور على الطريق اللى ممكن يوصلك للحاجة اللى انت بتدور عليها أنا بدأت بالتصوير وواحدة واحدة لحد ما وصلت للكتابة و التمثيل و طول ما أنت مجتهد هتلاقى ناس بتساعدك علشان توصل ركز على اللى نفسك فيه أهم حاجة تكون محدد و نفذ و انت ساكت لحد ما توصل للى انت عاوزه.

شكرا ليك يا علي ونتمنالك افكار وإعلانات ناجحة اكتر في المستقبل

شارك على فيسبوك
شارك على تويتر
شارك على لينكدإن
+