الـ Merchandising .. فن البيع من غير كلام

شارك على فيسبوك
شارك على تويتر
شارك على لينكدإن
+

بداية معرفتي بمصطلع الـ Merchandising كانت من شهرين تقريباً لما اتذكر قدامي من زميلة ليا في الشغل، وسريعا فهمتني هو معناه ايه عشان اكتشف انه تكنيك مستخدم او من المفترض انه يُستخدم حوالينا في اى مكان تسوق تقريباً ، و مع ذلك معرفتنا بيه تكاد تكون منعدمة.

بدأت اعمل شوية بحث، وأكتشفت قد ايه الموضوع كبير ومهم جدا لأي متجر أيا كانت نوعية السلع اللي بيقدمها للجمهور. والأهم اني – على حسب فهمي الشخصي – اكتشفت انه عنصر من عناصر الـ offline marketing اللي بتشتغل على نفسية المستهلك و تقبل اللاوعي عنده للسلع اوالمنتجات و اللي بيأثر بشكل كبير في قرارات الشراء اللي بيعملها فيما بعد.

طيب ايه هو merchandising ؟

هو كل حاجة ممكن تعملها في مساحة الـ store بتاعك عشان تقدر تقدم السلع للمستهلك بشكل يحفزه على اتخاذ قرار الشراء من عندك.

طيب كل حاجة بمعنى ايه برضو ؟

الـ merchandising

له أساليب و Techniques كتيرة جدا من أول ارضية متجرك لغاية سقفه ، و ممكن نحاول نحصرها سوا في نقط سريعة :

– واجهة العرض ( الفاترينة ) و عناصر العرض جوا المتجر نفسه ( رفوف – مانيكانات – شاشات – صور..الخ)

الفاترينة

– الـ Shelf signage 

ودي معناها اللافتات الصغيرة اللي ممكن تقسم الرفوف لـ Categories وممكن تستخدمها لتوضيح اى معلومات خاصة بالسلع دي زي الكميات و السعر و دي اقرب مثال لها هي اللافتات اللي بتكون موجودة  في السوبر ماركت الكبير متعلقة بين الممرات او متعلقة على الرفوف تحت كل منتج.

رف دعاية

– الـ Grouping related products 

ودا تكنيك بيستخدم في حالتين ، اما انك بتكون عارف ان المنتجات دي مرتبطة ببعضها من وجهة نظر المستهلك و بالتالي بتحطهم جنب بعض عشان تزود فرص بيع احدهم مع الآخر ، أو انك بتحاول تخلق حاجة جديدة عند المستهلك لإستخادم منتج معين بأنك بتوحي له  ان المنتج أ ممكن ينفع جدا مع المنتج ب ، والدليل الفكرة اللي بقدمهالك دي.

عرض ملابس

الحالة الأولى: هاتلاقيها دايما في السوبر ماركت الكبير اوالهايبر زي مثلا انه يحط لك النيسكافيه وجنبه على  طول الكوفي ميت.

الحالة التانية: بنشوفها أكتر في محلات اللبس او المفروشات لأنها بتعتمد على الخيال في تنسيق اكتر من منتج مع بعض لإثارة خيال المستهلك و تحفيز رغبة شراء الشكل اللي هو شايفه دا.

– العينات المجانية و الهبات

و دا اللي بيندرج تحته أمثلة كتير زي انك تجرب نوع جبنة جديد جوا سوبر ماركت، او عينات مفتوحة من زجاجات عطر او عبوات كريم للتجربة قبل الشراء، او حتى تجارب لمستحضرات التجميل زي الـ Stores الكبيرة المتخصصة في الماكياج ما بتعمل كل فترة و بتقيم make up sessions مجانية للسيدات.

عروض مجانية

– الأرفف المليانة بالبضاعة

وهنا مش معناه تكديس الأرفف بالبضاعة او المنتجات ، لكن معناه أن الأرفف تكون مليانة بالبضاعة بشكل جيد يوحي لك بأنك تقدر تاخد الكمية اللي انتي محتاجها و يوحي لك كمان بأن المنتجات دي لسا جديدة مش بقالها فترة في المكان. لأن صدق أو لا تصدق، المنتجات اللي بيكون موجود منها عبوة او اتنين بس على الرف مش بتدري ايحاء بأن عليها طلب كبير او انها بتخلص بسرعة لكن بتدي ايحاء عن المستهلك بعدم الثقة في المنتج دا و بيبعد عنها خاصة لو اول مرة يتعامل معاها.

– إظهار المنتجات اللي  عليها عروض

ودا من ابسط الأمثلة له لما بيكون فيه عرض في كارفور مثلا على صلصات الطماطم او الزيت او اى منتج تاني، بتلاقيه مش بس على الرف في مكانه الطبيعي لكن كمان في هرم كبير منه في نص المكان عشان يلفت انتباهك و يخليك تقف قدامه فترة كافية لمعرفة العرض دا و تفاصيله.

في محلات اللبس كمان بنلاقي ركن كبير لأي لبس عليه Sale . للأسف الركن دا في اغلب الوقت بيكون الأكثر عشوائية و عدم تنظيم دا غير ان المتبع دايماً هو انه يبقى في ابعد مكان في المحل او مكان معزول كأننا ماشيين في حجر صحي، ودا كبعا كفيل انه يدمر مبادئ الـ Merchandising كلها في ثانية.

البديل هو انك تعامل الجزء اللي عليه عروض دا بذكاء وبنفس اهمية منتجاتك الباقية و يمكن يكون اكتر أهمية أحياناً لأن فكرة العروض دايما من اكبر العوامل الجاذبة للمستهلك وبالتالي هاتخليه يدخل عندك و دي فرصة انه يشوف منتجات جديدة كمان.

عروض

دي كانت أهم استراتيجيات او تكنيكات اللي ممكن يستخدمها Store وهو بيعمل Merchandising محترم لمنتجاته

في المقال الجاي هانتكلم اكتر نصائح ممكن تفيدك عشان تعمل Merchandising صح و متجدد في الـ store بتاعك وكمان ايه الحاجات اللي ماينفعش نتجاهلها حتى لو عملنا الـ Merchandising صح .

شارك على فيسبوك
شارك على تويتر
شارك على لينكدإن
+