دليل المصمم | خللي الصندوق على يمينك وانت خارج – 1

3
shares
شارك على فيسبوك
شارك على تويتر
شارك على لينكدإن
+
What's This?

بعد السلام عليكم ، وعليكم السلام، واتفضل واشرب الشاي، وإن إسمي أحمد جبريل، ومصمم جرافيك، وديه أول مشاركة ليا على إعلانجي، وأهلاً وسهلاً واتشرفنا وكدة؛ حابب ابدأ سلسلة الحلقات ديه بمشكلة واجهتني سنين طويلة من أول ما قررت إني احترف مهنة مصمم الجرافيك -وكلمة احترف دي مش معناها كبير ولا حاجة دي معناها اني بدأت اخد أجر مقابل عملي-  إلي أن وفقني الله لحلها و حبيت إني افيد الناس زي ما ربنا جعل ناس تفيدني 🙂 .. المشكلة دي هي “الإبداع” و “التفكير برة الصندوق” .. ودي كلمة كانت مسببالي عقدة نفسية عشان كل الناس كانوا بيقولها كأنها كلمة سهلة اوي عليهم بس علي المصمم اللي بيعمل العمل الإبداعي نفسه بتكون صعبة جدا ! .. بالضبظ زي اللي بيطلب منك انك “تسويله جرافيكس في التصميم” 🙂 وطبعا انت اللي عليك الحمل كله و “مستنين إبداعك يا فنان” ! .. وإنت عارف اللي هايحصل بعد كدة ؛ بعد ما تتعب وتعمل تصميم إنت شايفه جميل يتقالك: “لا مش ده اللي كنت متخيله” أو “كنت حاسبك حتعمل احسن من كده بصراحة” 🙁 والكلمة دي بالذات بتتكرر كتييييير ومازالت بتتكرر .. ولكن إحنا اكيد حابين إن الكلمه دي تختفي من حياتنا او علي الأقل تقل.

اللي عايز أقولهولك إن الكلام ده بيتقال فعلا ومن واقع التعامل مع الناس مش معناه ان “تصميمك وحش” .. لأ .. ممكن يكون العميل ده نفسه ذوقه مش حلو او دماغه بنت ***.

Studio portrait of businessman making horns

المهم نرجع لموضوعنا: يعني إيه “إبداع” و “مصمم مبدع creative designer” ؟

أنا شايف ان الإبداع والمبدعين نوعين:

1- إبداع/مبدع بالفطرة: بيكون صاحبه فنان بفطرته – وربنا خلقه مبدع – اتعود علي الألون – وطريقة تفكيره بتكون مختلفه. يعني دايماً بيشوف الحاجات بطريقة فنية وبيفكر بطريقة مختلفة ودي بتكون موهبة من ربنا.

2- ابداع/مبدع بالخبرة: والنوع ده برضو بيكون عنده حس فني .. بس خبرته عايزه تزيد عن طريق التجارب والخبرات والشغل كتير والتصميمات اللي عينيه شفتها .. ومع الوقت ممكن يصبح مبدع محترف يعمل حاجات تبهر الناس من اول مره في وقت قصير.

Pottery making

لازم تعرف ان أول ما الواحد بيبدأ شغل يعني في السنة الأولي كمصمم بتكون دماغه فاضية يعني ماشفش تصميمات ولا ألون ولا أفكار وبالتالي فاقد الشئ لا يعطيه وده طبعا مش عيب او حاجة تنقص منه .. كلنا في بداية الأمر كنا مفتقدين الخبرة ومحدش مولود خبير ولا حتي المبدع بفطرته .. لازم يجرب عشان يعرف. ولو انت مصمم مبتدأ اول شئ لازم تعمله هو انك تشوف افكار وألون و تصميمات كتييييير علي قدر المستطاع لأن ده اللي حيثقل خبرتك وحيزود موهبتك ولازم يكون مستوي التصميمات اللي بتشوفها راقي و قوي ومتشفش اي تصميمات ضعيفة عشان اللي حتشوفه حتعمل تصميمات بنفس مستواه.

طيب السؤال دلوقتي: ازاي تزيد خبرتك و أيه الطريقة الصحيح لعمل تصميم مبدع؟

لو انت صنفت نفسك انك مصمم مبدع بالخبرة فالأبداع ده عايز دفعة عشان يشتغل ولازم عملية احماء عشان تنزل تجيب جون علطول:

1- اول حاجة لازم تاخد بالك منها هي ان اي تصميم او اي فكرة بيطلب منك ممكن تتنفذ بكذا طريقة ممكن تتنفذ بطريقة عادية وهي الطريقة اللي تيجي علي دماغ اي حد ممكن تطلب منه التصميم ده و طبعا الطريقة دي بتفتقد الإبداع و التميير لأنها تقليدية جدا و صاحبها نفذها بدون اي تطوير او اختلاف.

2- والطريقة التانية هي انك تحاول انك تعمل حاجة مختلفة ولو بالشكل أو بالألون أو بأي شئ وهنا مربط الفرس اللي بيميز المصمم القوي عن المصمم العادي .. المصمم المبدع المختلف عن المصمم التقليدي

وممكن الواحد يفتكر اني الطريقة المختلفة دي صعب الوصول لها و انها مرهقه جدا و ده وهم تاني ياريت متوقعش نفسك فيه الموضوع عكس كده تماما .. طبعا الموضوع مش سهل زي الطريقة العادية أكيد في تعب شوية زياده .. الموضوع ده متعلق بطريقة شغلك في كل تصميم بتبدأ فيه .. طيب ايه الخطوات بتاعتك في التصميم؟

– اول شئ وببساطة بعد ما تقرأ ايه المطلوب منك بتركيز وتعرف كل التفاصيل الممكنه عن الحاجة اللي انت حتعملها خدلك لفة علي النت و شوف تصميمات وألوان وأفكار ليها علاقة بالموضوع اللي حتعمله تصميم ولازم يكون ليها علاقة بالموضوع يعني لو حتعمل لوجو لشركة سياحة ماتشفش لوجوهات مطاعم مثلا!

– بعد لما تاخد اللفة دي ارسم اكتر من تصور للحاجة اللي حتعملها و دي خطوة مهمة اوي برضوا عشان ممكن يكون تصورك مش صح .. الخطوة دي بتقرب المسافة شويه بين الواقع و التصور اللي في دماغك.

– وممكن تاخد رأي أي حد في الأسكتشات اللي رسمتها و طبعا مش لازم تكون بترسم كويس اوي يعني ارسم خطوط توصح انت حتعمل ايه.

– وبعد كده ابدأ في عمل التصميم بالبرنامج المناسب يعني لو لوجو أعمله ببرامج الفيكتور زي “الإلستراتور” أو “الكورال” أو اي برنامج انت بتشتغل بيه و لو بوستر أو فلاير اعمله بـ “الفوتوشوب” وبعد لما تنتلهي من العمل اعمله برزنتاشن كويسة وإن شاء الله حتكلم عن المواضيع دي بالتفاصيل في المقالات القادمة.

خلاصة الموضوع : اسعي إنك توصل في النهاية لحاجة مميزة حتى لو هاتاخد وقت وماتسعاش إنك تنجز الحاجة وخلاص.

انتهت مقدمة النهاردة الخفيفة، أرجو إني أكون أفدتكم، والمرة الجاية هانغوص أكتر في تفاصيل الإبداع.

شارك على فيسبوك
شارك على تويتر
شارك على لينكدإن
+