لو حبينا نلقي نظرة على مستخدمي شبكة السوشيال ميديا Google+ في مصر ومدى تفاعلهم مع الشبكة؛ فأنا جربت أستخدم أرقام موقع: EffectiveMeasure. الأداة اللي بيستخدمها أصحاب المواقع بشكل كبير وكمان المعلنين اللي بياخدوا قرارات إنهم يعملوا إعلانات على موقع x بناءاً على أرقامه اللي شايفينها على EM. الأداة بتقيس سلوك المستخدمين وحجم الزيارات وبتدي أرقام ومعلومات كتير جداً، لكن رغم ده أنا مش عارف إيه هي الطريقة اللي بتقدر إنها تقيس بيها عدد المستخدمين وحجم الزيارات على شبكات السوشيال ميديا زي: Facebook أو Twitter أو Google+ .. رغم كدة، أو لغاية لما أعرف إجابة محددة ومتماسكة، تعالوا نستعرض سوا 4 أرقام خرجت بيهم من مستخدمي Google+ من مصر:
1- مفيش تطوّر لا بالسلب ولا بالإيجاب.
مبدئياً التريند بتاع الزيارات Visits بدأ في يناير 2015 ب13.6 مليون زيارة وفضل التريند يزيد ل14 وينزل ل12 وبعدين جاء في شهر 5 ونط نطة كبيرة ل17.6 وبعدين رجع تاني للتريند السابق لغاية لما وصل ل يناير 2016 بحجم زيارات: 12.4مليون. يعني منقدر نقول ان محصلش تطور لا بالسلب ولا بالإيجاب (وده وفقاً لEM .. ممكن توول تانية تقول العكس)
2- العمر:
أما أكبر فئة عمرية فكانت في يناير 2016 هي: 20-29 سنة بنسبة 45.54%. وكان الرجال بنسبة 70%.
3- الوظيفة:
أما أكبر مجال وظيفي فهو: Full Time Student بنسبة 21%. وعلى ذكر الطلبة فكان 37% من مستوى التعليم هو طالب جامعي لم يتخرج، و 22.48% طالب ثانوي و 19.99% طالب تقني / دبلومة.
4- الإنترنت:
بينما أكبر نسبة لـ internet access point: كانت من البيت Desktop/Laptop بنسبة 83.42% بينما في الشغل Desktop/Laptop فكانت 12.42% بينما من الموبايل كانت 2.83% بس! ، واخيراً في رقم تاني برضه بيقول إن اللي بيستخدم الموبايل انترنت تقريباً 40% بينما 60% مش بيستخدموا Mobile Internet.
5- الجدير بالذكر إننا لو قارننا بين أرقام Facebook – Twitter – Google+ في شهر يناير 2016 هانلاقي إنه وفقاً لـ EM فطبعاً في فرق في السرعات بين فيسبوك وبقية شبكات السوشيال ميديا، بس ديه معلومة مش جديدة، لكن الجديد إن الوحيد اللي زاد في عدد الزيارات كان “تويتر” في يناير 2016 مقارنةً بيناير 2015 بينما فيسبوك وجوجل+ كان عدد الزيارات في يناير 2016 أقل من يناير 2015.
رغم إن مقارنةً بين السنتين في نفس الشهر .. فإن فيسبوك زاد في عدد المستخدمين، وتويتر كذلك، بينما جوجل+ لسه زي ما هو بنفس ال4.3 مليون مستخدم، بينما تويتر 7.1 مليون، وفيسبوك 30.1 مليون.
ديه كانت بداية صغيرة لمجموعة من التقارير عن شبكات السوشيال ميديا في مصر، هاحاول إني أتعمق فيها أكتر. ولغاية التقرير الجاي، قوللي بقى، إنت شايف مستقبل تويتر وجوجل+ في مصر إزاي السنة الجاية؟
