أورانج تنسخ إعلان ڤودافون 2012 بالكامل

شارك على فيسبوك
شارك على تويتر
شارك على لينكدإن
+

كل يوم بتطلع عشرات ويمكن مئات الأفكار الجديدة علشان الإعلانات في العالم كله، وطبيعي جدًا يكون في تشابه في نفس الكونسبت بس بيكون معمول بطريقة مختلفة والاتنين بيكونوا ناجحين جدًا، ووارد يبقى الكونسبت مختلف ولكن الاستايل أو الشكل “Theme” واحد ده برضو عادي مافيش فيه مشكلة.
بس صعب أنه يكون نفس الكونسبت ونفس الـ Theme والإعلان عن نفس الخدمة وكمان لشركتين منافسين لبعض فى نفس السوق!!

تعالي كده نرجع بالزمن لورا مش اوي يعني لحد ٢٠١٢، ڤودافون في الوقت ده عملت خدمة جديدة لعملاء البيزنس وقالت “فودافون غيرت البيزنس” وكانت بتقول علشان كل واحد فينا بيجري على أكل عيشه فودافون غيرتلك نظام البيزنس علشان تعرف تشتغل وكان فيها عروض كويسة لاصحاب البيزنس على حاجات زي الانترنت والمكالمات وهكذا

وده كان الاعلان بتاع فودافون فى ٢٠١٢ الإعلان الـViews اللى عليه كويسة جدًا، الإعلان من تنفيذ  JWT Cairo

ڤودافون غيرت البيزنس

نرجع بقى بالزمن تاني من كام يوم كده تحديدًا7/4/ 2017 بس في بلد تانية “تونس”
هناك FP7 Morocco عملت كامبين لشركة أورانج تونس، الكامبين اسمها Orange Pro لأصحاب المهن الحرّة الكامبين بتتكلم عن انها بتقدم عروض مميزة لأصحاب المهن الحرّة علشان تساعدهم في البيزنس بتاعهم تقريبا نفس الخدمة اللى اعلنت عنها ڤودافون في ٢٠١٢

ولكن لما اتفرجنا على الإعلان بتاع أورانج تونس ٢٠١٧ الإعلان نفس فكرة إعلان ڤودافون٢٠١٢ أو ممكن نسميه استلهام بنسبة 99.9%

Orange Pro

ده بيحصل كتير في صناعات مختلفة في العالم كله، وطبيعي جدًا نفس الفكرة تستخدم في مجالين مختلفين وممكن تنجح في مع كل براند عملها، بس الغريب هنا ان الإعلان copycat من إعلان ڤودافون نفس الفكرة والتنفيذ كان بنفس الطريقة وبرضو لنفس الخدمة وفي نفس السوق!

وده يخلينا نتكلم عن أن مافيش حاجة بتستخبى دلوقتي أو زي ما بيتقال “الدنيا أوضة وصالة” كل حاجة دلوقتي بتتعرف بسرعة عكس زمان كان الموضوع صعب شوية ومحتاج وقت ومجهود، دلوقتي الحدث نفسه ممكن تشوفه لايف.

وعلشان ده مايحصلش تاني أو نقلل أنه يحصل لازم صناع الإبداع في المنطقة العربية يجتهدوا اكتر انهم يقدموا افكار جديدة ومختلفة وبسيطة وتوصل الرسالة اللى هما عاوزين يوصلوها للمستخدم أو العميل وماتكونش شبه افكار تانية.

شارك على فيسبوك
شارك على تويتر
شارك على لينكدإن
+